SEI IN > VIVERE VENETO > ATTUALITA'
articolo

Treviso: Radici coti e crui. Le bone rason e quee sbaiade dei tratori

6' di lettura
46

Dovemo schierarse a favor o contrari a chi che coltiva a tera. De istinto montemo anca noaltri sul trator e andemo a protestar o se sentemo sul careto, se bevemo un ombra e serchemo de rasonar un fià ?

Chi xe che seo ricorda ? Beo beissimo el siesecentosinque nea version a “pattino largo” che saria el xingoo largo par andar su pe e montagne. Containi de na volta, ma no le mia passà massa tempo, lo go avuo anca mi e lo go venduo par cior su consiio del Consorsio Agricoo un novo pi grando co quatro rode (no xingoii) motrisi, che le costà un saco de schei e nol dava su pe a coina e me ga fato indebitar. Sto qua le el primo problema, le imprese agricoee picoee le sovraendebitaee rispeto a quel che e fatura e a capasità de restituir i schei a aa banca.

Vedemo come che i xe divisi i containi: picoi che i fa coltivasion bone biogiche, i usa un fià de pestisidi, ma sol quando che ocore. Insoma i xe pecatori, ma quatro Ave Marie ei se puisse. Imprese agricoe bestiai che i gà sentinaia de etari e i te pol riconosserli parchè i dise e stese robe dei poitici e i gà l'aria de quei che i a sa longa e i finse de voer salvar el mondo, ma i usa toneade de putanaee chimiche e i ne aveena. Quei picoi e quei co e imprese bestiai massa grande i ga o steso problema ma schei diferenti par combater e star in pie: i grosisti e anca a GDO i vol pagar manco de un franco.

Radicio roso lungo e noaltri gavemo a rubrica “Radici coti e crui” e ne piase el radicio roso e o paghemo al marcà 1,65 Euri (maedeto chi che i gà inventai, stavimo massa ben coa Lira) se andemo a ciorlo al supermercà, tanto par veder se e casiere le tute bionde, lo paghemo 2,50 Euri se le quel tondo come na baeta, se le quel longo o paghemo 3,00 Euri. Se i ghe gà tacà el cartein IGP (Indicasion Geografica Proteta) riva a costar 3,50. Ti vol bioogico ? Andemo anca pi su col presso. Quanto xe che ciapa el contadin ? 0,40 centesimi su quel tondo come na baeta e 0,45 o anca 0,48 su quel longo.

Le sirca el quindese par sento de quel che o paghemo noaltri. Se i smete de far i containi e i va a far i rapresentanti coa giacheta e aa cravata i ghe da a stesa percentuae e i vien casa a sera coe man nete ee scarpe aa moda coa ponta. Bastaria che al contadin andesse al vinti par sento e cambiaria tuto. La GDO no se acorzaria gnanca de incasar de manco, ma par le imprese nostrane saria a sopravivensa e na speransa par el doman. El problema sensa zirarghe atorno le par i containi quel de veder pagà mejo i so prodoti.

Adeso parlemo dei alevamenti dee bestie che i xe diventaii grandi e i se dedica aa tortura de massa su sti poveri animai: pitte, dindiot, porsei, vache, vedei, i magna mangimi co dentro antibiotici e tuta na serie de putanaee che xe mejio no saver se no no magnemo pi carne. Na vaca che navolta pora cea la diventava nona dei videetti e a viveaa ani feise e col soriso, adeso la vive 4 ani e i a copa e no a riesse a partorir pi de un vedeo nea so vida, robe da mati. Ghe xe anca alevamenti che i rispeta i animai i li tien nee staee bee grandi e li manda fora col sol a pascoar e a inamorarse tra de iori.

Eora ste do agricolture e sti do tipi diferenti de aevamenti i gà i stesi problemi? Nooo, e no bisogna misciarli nea protesta. Naltro problema (saria anca stufo de parlar de problemi e vorria parlar de mona) le a finta democrasia dei paesi del sud Amerega, che i se gà inventà la “Libera sircoasion e el libero scambio dee mersi” par mandarne qua da noaltri i lori prodoti che i xe coltivai co quei veeni chimici che in Italia i xe vietaii da ani.

Quea stitica de Bruxelles che a se ciama Von no so che, prima la ga dito “Vegnè portè qua tuto quel che voè, tanto mi magne sol che i Kinder Brioche ma quei bianchi, e lassemo che i veeni se i magne el popoo”. Le suceso un casin e la stitica la ga fato na retromarcia che la lassà i covertoni in tera. Parria un suceso, ma de sta roba scrivemo naltra volta.

A Bruxelles no i dise come poder darghe i aiudi PAC e PNRR sol che ai picoi containi vardando che i coltivi ben e sano e no darghe sempre schei ae imprese massa grande. L' Europa dopo e proteste la ga dito de si ai aiudi al gasoio e ai pestisidi, cossì i favorisse la distrussion dea tera e i fa ingrasar e imprese grose. Savè cossa che xe el GLIFOSATO ? Le un diserbante canseroseno e i lo ga prorogà par altri diese ani.

A Coldireti dovaria saverle ste robe, dovaria protestar meterse e maie zaee e tirache (bretee) el capein e andar a Montesitorio a far cagnara, ma se tra i lori asosiaii ghe xe le pi grandi imprese, quee che ciamemo “massa grandi”, tanto par far un esempio BF che le Bonifiche Ferraresi che la xe quotaa in borsa, come voè che a Coldireti posa difender i interesi deii picoi e anca quei dei “massa grandi”, no xe posibiee. Modificar el tipo de COLTURE, divesificar e obligar a meter na parte de tuti i campi a piantumasioni de alberi in percentual sue coltivasion.

Ve disemo naltra roba e se fermemo, se se rivai a leser fin qua ve ofrimo na ombra quando che se trovemo in ostaria. Le imprese “massa grandi” le riseve el 85% dei schei (i famosi Euri) deaa PAC e de tuto el PNRR, anca se iori i xe gnanca el 20% dee imprese agricoee. Eora disemo si aee proteste, ma ognun dovaria andar co i so tratori. Noaltri andemo col siesentosinque 605 e chealtri che i vaga coi tratori grandi. Do diferenti manifestasion, par do diferenti tipi de containi e anca do diferenti manifestasion par do diferenti tipi de aevatori. Ricordè tuti i marti le na anteprima del zornal de mercoe dea Rubrica “Radici coti e crui”.



Questo è un articolo pubblicato il 27-02-2024 alle 18:27 sul giornale del 28 febbraio 2024 - 46 letture






qrcode