SEI IN > VIVERE VENETO > CULTURA
articolo

Treviso: "Radici coti e crui": pan e pisacan, piato da poreti ?

3' di lettura
50

Le None lo ciama pisacan par le so proprietà diuretiche. Chi che vol eser un fià pi fin lo ciama: dente di cane o dente di leone, ancora pi fin tarassaco che le italian. Se voè far impresion che i ve scambia par un o una che gà studià, disè taraxacum officinale. Riva coa primavera e seo pol trovar, basta andar in meso aa campagna, ciaparlo tanto no scampa, no le un jevero, e cusinarlo come che ve disemo noaltri o come che savè za. No stè a sbaiarve, le anca quel mato e veenoso, meio saria portarse na vecia che a se intende

Na bea zornada de sol, ciapè un secio col manego, un cortel e se gavè el can porteo co voaltri cossì pol corer e divertirse anca iu. Quae supermercato che ve consiemo ? Nesun andè par campi, caminè che ve fa ben fin che vedè el pisacan, le zaoo beo, no se sconde. De soito “Marso ventà, april temperà, magio suto, formento par tuto” par dir che saria april el so mese, ma pol vegner fora anca antisipao.

Lo gavè visto? Eora col colteo cominsiè a sceglier quei co manco fiori. Ciapeghe co na man el manego e co quea altra taiè un sentimetro soto la fin del manego sua radise. No pi zò, cossì a pol crescer de novo. Tornè a casa col secio pien, metè el racolto nel lavandin coa acqua frea. Moveo par su e par zo, ma no ste a strussarlo massa. Pol eser dea tera che a vien via. Dovè far do o tre volte sta operasion de lavadura.

La pentoa co acqua che a boie le sul fogo ? Metè el pisacan a moio e feo boir par diese minui. Gavemo dito diese, no che ve metè col teefonin a veder chi che ve ga scrito e o desmenteghè. Le tannico che vol dir anca che le amaro e no se deve coser massa. Xe verde ancora beo ? No deve eser maron. Scoeoo ciapandoo par i cavei co un coino o na forcheta quel che voè, ma no dovè rovesar a pentoa come co na pastasciuta, se no ve magnè anca do tre saseti che i gera restai sul fondo.

Stendè el pisacan su un taier e co un colteo, se le ben afilao meio, taiè el tochetin che le visin dea radise. Na bea padea, que col fondo groso, do spichi de aio e oio extraversine (femo finta de crederghe che o sia) e feo andar par cinque minui. No de pi. Fin sto momento el pisacan le restà pi o manco intero, adeso meteo de novo sul taier e taieo a tocheti, no ve femo far do volte a stesa menada.

Lu le duro e no se smoa coa cotura, se smoa co o taiè a tocheti, le un trucheto. De novo nea padea, par un minudo. Se voè podè meter un fià de peperonsin, ma le a gusto personae. Preparar el pan queo greso, meio se fe voaltri na bea pagnotona. Fete de pan brustoio co sora el pisacan e magnè de gusto col vin bon e se siori.

Se racomandemo de vardarlo ben da no sbaiarve, le quei che ghe someia e le pericoosi: senecio vulgaris, senecio jacobaea, senecio inaequidens, sti qua no i xe boni. Par capir, come che ve gavemo dito, dovè portar na vecia che a sa. No gavè a vecia ? Cioeve un bon libro coe foto. Recordeve de no taiarlo massa in basso sua radise e no ste a cavarlo co tuta a radise. La Rubrica “Radici coti e crui” ve sauda, se vedemo sul zornal de mercoee che se lese antisipà de marti.



Questo è un articolo pubblicato il 05-03-2024 alle 19:46 sul giornale del 06 marzo 2024 - 50 letture






qrcode