SEI IN > VIVERE VENETO > CULTURA
articolo

Treviso: Treviso 7 aprie 1944. Xe pasai 80 ani e no desmenteghemo

4' di lettura
34

I mericani ne gà dito che i voea ciapar a ferovia, ma no i xe massa 180 roplani ? Se lera quea l'intension i podea paracadutar Big Jim co na bombeta picoa da binari, no cavar a primavera a miesiesento trevisani. I xe spesialisai a contar bae e i no gà perso el visio gnanca adeso che i ne vol far creder che a Mosca i xe stai quei col turbante de loro inisiativa, mia mandai dai stessi che i ne gà martirissà el 7 aprie 1944. Femo finta de crederghe ?

A noaltri costa scriver e a voaltri ve costa lezer. Riva de novo a rubrica “Radici coti e crui” e saria beo meterse a ciacolar se sto ano el spàreso gavarà el gambo duro co tanta fibra o pi moo come che ne piase a noaltri. Ghe vol a piova e par che adeso la riva anca a Cimadolmo, Casteo, Vallà, Riese, Basan e anca la par soto de Padoa e se go desmentegà un paese de produsion tipico disemeo che o zontemo, gavemo rispeto de chi fa fadiga, no dei conta bae de na volta e de adeso.

Invese dei spàresi parlemo dee bombe che xe rivaee dal siel el 7 aprie 1944. No gera tempesta de quea grosa che la vien zo e ne fa tanto rabiar. Lera un siel diventà nero coverto dae ai dei roplani e no ghe gera salvesa. Dovemo far sempre conti grandi come col Vajont ? Na onda de 250 metri scrivemo come sui asegni: dosentosinquantametri e provemo anca a scriver sentotantareoplani. Noaltri semo xente semplise, i numeri grandi i ne fa paura.

Eora disemo 1.600 e lo scrivemo: miesiesento, ma cossa ? Cossa xe sto numero miesiesento ? I xe trevisani fati a tochi che i diventa mie volte de pi, da tirar su e sercar de darghe un nome ! I cei, boce, putei che i no gà visto rivar ben a primavera, i xe stai 123 sentovintitre ! Par eser sicuri de ciapar ben de mira la stasion e i ne gà moà 2.636 domiasiesentotrentasie bombe. No savemo chi che le gà contae, ma i le presisi, a si sui conti i xe presisi e i li fa par i nostri interesi, anca adeso.

I mericani ne gà portà a democrasia, fasendo un fià de rumor ma i xe cossì, no i conosse e bone maniere. Voè che ve contemo tuta a storia del 7 aprie ? No se pol contarla, no savemo a verità e i vinsitori noa conta iusta. Disemo che i ghe gavea ciapà gusto, podemo pensar cossì? Lera un siogo, i se metea el giuboto de pee co i stemeti co i condor, le aquiee e ne considerava a noaltri come picioni. Invese lera bea xente, i trevisani quel dì i vardava el siel seeste e i disea: “La guera la sta par finir”. Bee, beissime le done trevisane coi cavei co e onde fate a casa col fero e un vestitin blu coi boi bianchi, sempre queo ma che granda elegansa.

Bee, beissime col soriso dea speransa e visin de lore i cei, boce, putei co braghete corte e i zenocci sbucciai a corer drio a e lusertoe tra e piere. I rici i se gà impetà de sangue e tuto un polveron e i cei, boce, putei no i xe movea pi. Se lori che i core sempre no i se move, le rivà a morte. Tanti, tantisimi omeni, chi l'avea za combatuo e i gera tornai e chi gavea a speransa de no combater mai, de no dover copar naltro eser uman compagno de lu. I gera a tochi o interi ma coe budee in man, e da na reoplano no podè vederli e ve par un siogo.

Na spusa, lera na spusa che a rivava da soto e maserie. Treviso bea, adeso che demo a bever no spritz, lera zo al 80 par siento. I la gà ricostruia pi bea de prima, anca se do tre paassi no le tanto bei, ma i la gà fata nova. Xe pasai 80 anni, par niente. I stesi, si sempre iori, adeso i vorria mandar i nostri fioi a morir in Ucraina e in Russia.

Disemoe de NO, ma disemogheo beo forte NO. Se i vol che i vada iori, coi poitici taiani e anca quei ziornalisti che i baa a comando el baoo del “Qua qua”. Disemoghe de NO, beo forte, sighemo ancora pi forte NO aa guera. I nostri pari i nostri noni i la ga fata e i la ga fata anca i cei, boce, putei, inosenti.



Questo è un articolo pubblicato il 26-03-2024 alle 18:36 sul giornale del 27 marzo 2024 - 34 letture






qrcode